Saraakiil Mareykan ah ayaa sheegay in ay meesha ka baxeen guulihii ay ciidamada Dawlada Federaalka Soomaaliya ay ka gaareen Al-Shabaab markii dagaalka lagu qaaday dib u doorashadii madaxweyne Xasan Sheekh.
Mareykanka ayaa sheegay in lexdii bil ee la soo dhaafay ay Al-Shabaab dhinaca kale ugu rogeen guulihi ay ciidanka xoogga dalka Soomaaliya ka gaareen howlgallada ka dhan ka ah Al-Shabaab.
Saraakiisha difaaca Mareykanka waxay kale oo sheegeen, in tirada maleeshiyaada Al-Shabaab ay hadda dib ugu soo laabatay tiro u dhaxeyso 12,000 ilaa 13,000 oo dagaalyahan.
Kororkaasi ayay sheegeen inuu dhacay kadib marki ay Al-Shabaab xoojisay isku daygeeda dhallinyarada ay qorato iyo dhaqaalaha soo galo kooxda, iyaga oo si gaar ah uga faa’iideystay is-afgaradki horraanti sannadkaan ay kala saxiixdeen Itoobiya iyo Somaliland, kaas oo marki danbe keenay inuu xumaado xiriirka diblamaasiyadeed ee Soomaaliya iyo Itoobiya.
Mareykanka ayaa horey uga digay in Al-Shabaab ay is-Heshiiskaas u adeegsan karto in ay ku qoroto dhallinyaro cusub, waxaana hadda muuqata in ay sidaas dhacday ayaga oo ka dhaadhicinaya dhallinyarada in ay dalkooda ka difaacan cadowga soo jireenka ah.
